Mezoriento : lasttempaj artikoloj
- Ĉu ŝtonmortigo en Irano ?
- Sauda aresto pro terorista komploto
- Cisjordanio denove hermetikigita de Israelo
- Unuaj postbalotaj rezultoj aperas en Irako
- Mortis plej grava islama kleriko de Egiptio
- Ahmadineĵad vizitas Afganion
- Mallonge el Mezoriento...
- Voĉdonkalkulado ekkomenciĝas en Irako
- Malario kaj malfortaj ostoj eble mortigis Tutanĥamonon
- Israelaj restriktoj igas vivon "ekstreme malfacila" por Palestinanoj
La mondo en bildoj
|
www.flickr.com
|
| Klaku.net | Via demokratia amaskomunikilo |
|
| Neniu agnosko de Israelo, deklaras gvidanto de Hamaso |
|
|
| Mezoriento - Politiko |
  PALESTINO /  ISRAELO - 23-an de januaro, 2010.
La politika gvidanto de la palestina Hamaso diris, ke lia grupo ne agnoskos Israelon, malgraŭ novaj premoj kaj donos la prioritaton al rezisto kontraŭ la Juda ŝtato. Dum amaskunveno en la siria ĉefurbo hieraŭ vendredon kiu markis la finiĝon de la israela atako kontraŭ Gazao antaŭ unu jaro kaj kiu mortigis 1400 Palestinanojn, Meshaal diris, ke Hamaso ne volas alian militon kontraŭ Israelo, sed daŭrigos armitan lukton por liberigi la okupatan landon.
"Hamaso plue malakceptas la okupon kaj rifuzas agnoski la pravecon de la Cionisma ento. Prioritato restos al konstruo kaj evoluo  de la rezisto," diris Meshaal, kiu loĝas en Sirio kune kun aliaj Hamasaj gvidantoj en ekzilo. "Premado, sieĝoj, tentoj kaj malfermataj pordoj aŭ komunikkanaloj ne trompos Hamason, kiu ne kompromitiĝos pri siaj rajtoj. Hamaso estos sole tentita restarigi la landon," Meshaal deklaris. Meshaal ankaŭ parolis pri aliaj kontaktoj inter Hamaso kaj okcidentaj delegacioj ekde la milito en la Gaza-Strio, inter kiuj kunsido kun usona grupo, kiu inkluzivis Jack Matlock, siatempan usonan ambasadoron en Moskvo. "Gazao hodiaŭ ankoraŭ estas vundita. Ĝiaj domoj ankoraŭ estas detruitaj. Ĝi estas ankoraŭ sieĝata kaj ĝiaj landlimoj ankoraŭ restas fermataj. Aldonu al ĉi tiu la novan ŝtalan muron," Meshaal diris, parolante pri la nova ŝtalstrukturo konstruata de Egiptio laŭ ĝia landlimo kun Gazao, kiu celas halti la kontrabandadon de armiloj kaj varoj en la Strion. "Hodiaŭ ni ne serĉas militon sed se milito estas trudita al ni, ni batalos furioze," Meshaal diris. Li diris ankaŭ, ke repacigo kun Mahmud Abbas, la palestina prezidento, necesas por plifortigi la palestinan kaŭzon, sed li neniom faris novajn proponojn pri kiel tiel fari, post kiam egiptaj penoj estigi interkonsenton inter la du flankoj malsukcesis. Meshaal ankaŭ diris, ke la kaptita israela soldato Gilad Shalit ne estos liberigita, krom se Israelo liberigos centojn da palestinaj kaptitoj. "Shalit ne estos hejme antaŭ la liberigo de niaj kaptitoj," li anoncis aal la amaskunveno, kulpigante Israelon por la malsukceso atingi interkonsenton pri la liberigo de tiu ĉi soldato, kiu estis kaptita en junio 2006. Samtempe Israelo pagis 10,5 milionojn da usonaj dolaroj al la Unuiĝintaj Nacioj por nemoveblaĵoj de la monda organizaĵo,  difektitaj dum la israela milito kontraŭ Gazao antaŭ unu jaro. "Per ĉi tiu pago, la Unuiĝintaj Nacioj konsentis, ke la financaj aferoj rilate al tiuj okazaĵoj estas finitaj," Martin Nesirky, UN-proparolanto, hieraŭ anoncis. Altranga israela diplomato ĉe la UN, parolante sub kondiĉo de anonimeco, aldonis, ke Israelo "decidis libervole pagi al la Unuiĝintaj Nacioj kaj ja efektive tion faris." Entute 53 instalaĵoj uzitaj de agentejoj de la Unuiĝintaj Nacioj estis difektitaj aŭ detruitaj dum la milito, inter kiuj 37 lernejoj, 6 sanocentroj, kaj du staploj. La ĉefa difekto de UN-nemoveblaĵo okazis la 15-an de januaro lastjare, kiam israelaj obusoj frapis UN-konstruaĵaron, ekbruligante staplon kaj detruante grave bezonatajn manĝaĵojn kaj sukuraĵojn. UN-respondeculoj diras, ke ili havas indicojn, ke blanka fosforo, kiu povas kaŭzi severajn brulaĵojn, estis uzita en la atakoj. Israelo diris siaflanke, ke batalantoj de Hamaso uzis la konstruaĵaron por lanĉi atakojn kontraŭ siaj fortoj sed poste pardonpetis por la okazaĵo kaj detruoj. |
