| Mezoriento - Diversaĵoj |
  ISRAELO /  IRANO - 21-an de januaro, 2010.
La israela ministro pri turismo renkontis iranan oficialulon ĉe turisma foiro kaj diskutis la eblecon por Israelanoj iun tagon viziti Iranon. Irano kaj Israelo estas pli kutime ĝismortaj malamikoj, kaj la irana prezidento pli ofte publikigas malamikajn minacojn forviŝi Israelon el la monda mapo ol bonvenigajn mesaĝojn. Sed ĉe la ĉiujara turisma foiro FITUR en Hispanio, la kunsido inter la du landoj estis amika.
Sed provoj de la Israelanoj alparoli la sirian delegacion estis repuŝitaj. Ĉe la improvizita kunsido, la reprezentanto de la Ministerio pri Turismo de la Islama Respubliko invitis la israelan ministron pri turismo Stas Miseĵnikov viziti la urbojn Ŝirazo kaj Esfahano. "Ni havas mirindajn naturajn rezervojn kaj kulturajn ejojn, ni bonvenigas vin veni kaj viziti," la respondeculo kiu respondecas pri la irana budo en la foiro diris al la israela ministro. "Mi kredas, ke la tago alvenos kiam israela ministro, kaj ankaŭ israelaj civitanoj, povos viziti kaj ŝati Iranon," Sro Miseĵnikov respondis.
La israela ministro ankaŭ vizitis la budojn de Jordanio, Palestino, Maroko kaj Egiptio. La interrilato inter Irano kaj Israelo, kiun iranaj respondeculoj nomas "la Cionisman enton" aŭ "la okupantan potencon", ofte aperas ege malfacila. En 2005 la irana prezidento Mahmud Ahmadineĵad alvokis al "forviŝo de Israelo de sur la mapo." En 2007 citita de la oficiala irana novaĵagentejo, li diris, ke la retronombrado ĝis la detruo de Israelo jam komenciĝis. "Se Dio volas, baldaŭ ni vidos la detruon de la koruptata okupanta reĝimo," li diris. Li ankaŭ publikigis komunikaĵojn en kiuj li neas la gravecon de la Holokaŭsto. En 2006 israela ministro diris, ke militaj atakoj kontraŭ Irano "ne povas esti ekskluditaj" se Irano ankoraŭ plutraktas siajn atomajn ambiciojn...
|
