BARATO / USONO / KANADO - 09-an de marto, 2010.

Sciencistoj anoncas, ke ili identigis la fosiligitajn restaĵojn de granda serpento, kiu manĝis dinosaŭrajn ovojn. La 67-milionjara skeleto estis trovita en dinosaŭra nesto. La studo, eldonita en la revuo "Plos Biology", montras la unuan rektan indicon de nutrokonduto de fosilia primitiva serpento.

Ĉi tiu 3,5 metrojn longa fosilia serpento kredeble sin nutris per ovoj de saŭropodoj, ĉar ĝi estis trovis envolvita ĉirkaŭ bebo-titanosaŭro. Kiam plenkreskinta, la plantmanĝanta titanosaŭro pezis ĝis 100 tunojn. Multaj personoj hodiaŭ timas serpentojn, kaj ĉi tiu esploro indikas, ke eĉ gigantaj dinosaŭroj eble ankaŭ estis timigitaj de ili.

"Estis tia raviĝo eltrovi tian momenton frostitan en tempo," diris la Doktoro Dhananjay Mohabey de la Geologia Enketaro de Barato, kiu eltrovis la fosilion. Fakuloj ĉe la Universitato de Miĉigano, Usono kaj Universitato Mississauga de Toronto, Kanado, studis kaj identigis la trovaĵon. Laŭ tiuj esploristoj, la fosilio ne havis la moveblajn makzelojn de modernaj serpentoj kaj certe devis peni por manĝi dinosaŭrajn ovojn. Tamen, la beboj de ĉi tiuj dinosaŭroj havis la ĝustan grandecon.

La fosilio estis unue malkovrita en Barato en 1987, sed ne antaŭ 2001 tiuj amerikaj sciencistoj estis kapablaj eltrovi, ke troviĝis serpento inter la dinosaŭraj ovoj. La esploristoj nun kredas, ke la serpento estis atakanta bebo-dinosaŭro kiu ĵus ekaperis el sia ovo. La evento estis tiam tute haltita de natura katastrofo, eble ŝtormo, kaj la tuta sceno estis kvazaŭfrostita en tempo, por milionoj da jaroj...

La serpento estas unu el la malabundaj bestoj, kiuj predis al gigantaj dinosaŭroj.

Resumita artikolo el la brita BBC.