INDONEZIO - 20-an de oktobro, 2009.

Susilo Bambang Yudhoyono faras sian ĵuron de enoficiĝo por dua kvinjara mandato kiel prezidento de Indonezio, kiu estas la plej dense loĝata Islama lando en la mondo. Sro Yudhoyono gajnis ĉe la balotejoj en julio, parte pro tio, ke li fortigis la restriktojn kontraŭ korupto. Sub li, la kontraŭkorupta agentejo fariĝis potenca ŝtata organizo. Sed korespondantoj diras, ke li hodiaŭ alfrontas aliajn defiojn, inter kiuj estas terorismo, la sekvo de septembra tertremo en Sumatro kaj alta senlaboreco.

La tutmonda financa krizo ne frapis Indonezion tiel severe kiel kelkajn siajn najbarojn, sed multaj tamen estas trafitaj de la malrapidiĝo de la ekonomio kaj milionoj ankoraŭ vivas sub la indikilo de malriĉeco. Ĉe ceremonio en Ĝakarto kiun ĉeestis la gvidantoj de Aŭstralio, Malajzio, Singapuro kaj Orienta Timoro kaj televide elsendita al la insularo de 234 milionoj da homoj, Sro Yudhoyono ĵuris sur la Korano, Islama sankta libro, kaj konfirmis la konstitucion. "La esenco de nia programo por la sekvontaj kvin jaroj estos plibonigi bonfaron, plifortigi demokration kaj justicon," li diris. "En la mezo de la ekonomia krizo, Indonezio povas ankoraŭ kreski pozitive. Sed ni ne povas resti neaktivaj, niaj taskoj estas multaj por fari."

Analizistoj fremdaj asertas, ke la prezidento Yudhoyono devas nomumi teknologiismanojn kaj profesiulojn prefere ol karierpolitikistojn en sia nova Kabineto por allogi lasttempe malvigliĝintajn fremdajn investojn. Reformi la burokratismon kaj labori pri novaj leĝoj, plibonigi la landan infrastrukturon ankaŭ necesas por daŭrigi la ekonomian kreskon, de proksimume 4% ĉi tiun jaron, ekonomikistoj diras. Sro Yudhoyono devos pruvi al siaj balotantoj, ke ili elektis la pravan viron.

En la julia balotado, la prezidento gajnis 60,8% de la voĉdonoj, 34% pli ol la plej proksima kontestanto, Megawati Sukarnoputri, siatempa prezidento kaj filino de heroo de la nacia sendependeco Sukarno. Sinjorino Megawati kaj la trialoka kandidato, eksiĝinta vicprezidento Jusuf Kalla, poste postulis, ke la venko de Yudhoyono estu nuligita, ĉar laŭ ili la voĉdonlistoj estis eraraj, kaj milionoj da voĉdonoj miskalkulitaj. Sed la Konstitucia tribunalo decidis en aŭgusto, ke ne estas indicoj ebligante aprobi iliajn akuzojn.