KONGO KINŜASA - 18-an de junio, 2008.

Projekto uzi plejlastan fotilon sur satelito por kontroli senarbigajn nivelojn de la Konga baseno en Afriko ĵus estis publikigita. La altkvalita kaj precizega RALCam3 fotilo, realigita de britaj sciencistoj, donos la unuan detalan vidon de la loka indico de arbarperdo. La projekto estas parto de la "Congo Basin Forest Fund" (Fonduso de la Arbaro en Konga Baseno), komuna iniciato de brita kaj norvega registaroj kiu kostos 136 milionojn da eŭroj.

La fonduso celas limigi klimatan ŝanĝiĝon kaj malhelpi senarbigon en la regiono. Parolante okaze de la lanĉo de la projekto, la brita ĉefministro Gordon Brown diris : "Ni promesas kunlabori por sekurigi la estontecon de unu el solrestantaj antikvaj arbaroj en la mondo. Ni nepre devas konservi niajn arbarojn kaj ni reduktos tutmondajn emanaĵojn kaj pritraktos klimatan ŝanĝiĝon."

La Konga pluvarbaro estas la dua plej granda en la mondo. Ĝi reprezentas pli ol kvarono de la planeda restanta tropika arbaro. Ĝi ankaŭ estas la hejmo de pli ol 50 milionoj da homoj, kaj ŝirmas proksimume 10 000 speciojn, 1 000 specoj de birdoj kaj 400 tute alispecaj mamuloj. Studo de la Unuiĝintaj Nacioj avertis, ke krom se oni nun agas cele al pritrakto de senarbigo en tiu regiono, pli ol 66% de la pluvarbaro perdiĝos antaŭ 2040.

RALCam3 provizos la observantojn per tre precizaj fotoj, orbitonte 650 kilometrojn super la Tero. Ĉi tiu sistemo ankaŭ havos aliajn aplikojn, kiel ekzemple gvatadon de ekologia ŝanĝo kaj mara polucio.

Vidu ankaŭ :

• la retejon de la "Congo Basin Forest Fund" (angle kaj france)