KONGO KINŜASA - 22-an de aprilo, 2008.

Plano por konstrui la plej grandan kaj la plej potencan akvoenergian akvobaraĵon en la mondo estas diskutata en Londono. Financistoj kaj Afrikaj politikistoj rigardos kiel financi la koston de 80 miliardoj da usonaj dolaroj por la Granda Inga projekto. La elektrofabrikejo en la Demokrata Respubliko de Kongo produktus duoble pli da energio ol la grandega Ĉina Baraĵo de la Tri Gorĝoj.

Oni esperas, ke tiu baraĵo akcelos la Afrikan elektroprovizon kaj triobligos ĝin, sed oponantoj dubas, ĉu ĝi helpos al la plej malriĉaj Afrikanoj kiuj restas sen elektro. La Monda Energia Konsilio, (angle WEC) kiu estas gastiganto de la dutaga renkontiĝo en Londono, diras, ke la Granda Inga projekto helpos 500 milionojn da Afrikanoj al kiuj mankas elektroprovizon. "Ni devas altigi la nivelon de aliro al komerca energio por ĉiuj tra Afriko kaj aliaj mondopartoj, kie la loĝantaro alfrontas ĉi tiun malriĉecon," diris la Ĝenerala Sekretario de la WEC Gérald Doucet.

"Ni ne povas atingi tian celon, sen konstrui ĉi tiujn projektojn, sed kompreneble, sur daŭrigebla bazo, kiu enkalkulas la sociajn, civilajn kaj ekologiajn aferojn. Kaj mi povas diri, ke en la pasinteco, eraroj estis faritaj, sed WEC estas tie ĉi por certigi, ke tiuj eraroj ne ripetiĝos," Sro Doucet aldonis. Laŭ la projekto, la elektra potenco estus elsendita al aliaj landoj tra giganta nova disdonsistemo ĝis Egiptio en la nordo, Niĝerio en la okcidento kaj Sudafriko.

Por ke la konstruo povu ekkomenci laŭplane en 2014, la Monda Energia Konsilio alvokas al financo de studo pri farebleco, farota kiel eble plej baldaŭ. La Granda Inga projekto baziĝus sur la rivero Kongo apud du jam ekzistantaj akvoenergiaj baraĵoj kaj komencos sian funkciadon inter 2020 kaj 2025. La planoj inkluzivas altan akvobaraĵon, longan akvorezervujon kaj basenon kun kapacito produkti 320 teravatthorojn da elektro ĉiujare. La ideo por la projekto estis unue konceptita en la jaroj 1980, sed politika tumulto en la Demokrata Respubliko de Kongo malhelpis la realigadon de ĉi tiu projekto.

Bildo : elsatelita vido de la regiono de Inga. (Fonto : Google Earth)