JAPANIO - 26-an de aprilo, 2008.

La Olimpika torĉo renkontis protestojn dum sia stafetkuro en la Japana urbo Nagano. Sekurecrimedoj estis streĉaj laŭ la vojo, sed du manifestaciantoj provis kapti la torĉon kaj tria ĵetis ovojn al la flamo. Ĉiuj estis arestitaj. Korespondantoj diras, ke la transsendo pasis tamen sen grava interrompo.

Tra la stratoj estis vicoj de miloj da Ĉinaj subtenantoj, kaj ankaŭ dekoj da kontraŭĉinaj protestantoj. Amaso da subtenantoj de la Olimpikoj salutis la torĉon kiam la fina kuristo kompletigis la transsendon apud urboparko. Respondeculoj diris, ke kvar homoj estis iomete vunditaj en apartaj okazaĵoj, kaj fumoemaniga tubo estis ĵetita ĉe la stafetkurado tamen sen efiko, laŭ raportoj.

Pli ol 3000 policanoj estis envenigitaj por gardi la eventon post kiam manifestacioj fiaskigis la kuron de la torĉo en aliaj urboj. Pro lasthora ŝanĝo, la kuro de la torĉo tra Nagano komenciĝis en aŭtoparkejo prefere ol en 1400-jara Budhana templo. La templo retiriĝis kiel deirpunkto post kiam ĝi esprimis sian kontraŭstaron pri la Ĉina subpremo en Tibeto.

Protestoj aliloke laŭ la torĉa irvojo, kaj la grandegaj sekurecaj operacoj kiujn ili naskis, turnis la festan travojaĝon en 20 landoj en tion, kion analizistoj karakterizas kiel "publikrilata katastrofo" por Pekino. Antaŭe, Japanio diris al organizintoj de la Ĉinaj Olimpikoj, ke la granda sekurecteamo kiu akompanis la flamon aliloke ne estos bonvena ĉi tie. Japanio, kiu havis ĝenatan interrilaton kun Ĉinio, prenis vastajn rimedojn por certigi, ke interrompo de la stafetkuro estu plejeble minimumigita.

Dum la sekvontaj malmultaj restantaj tagoj, la torĉo haltos en Sudkoreio, Nordkoreio, kaj Vjetnamio.